MIAINA AO ANATIN’NY FANJAKAN’I RAY IZAY ANY ANDANITRA

                 Ary nahare feo mahery avy teo amin’ny seza fiandrianana aho nanao hoe : Indro ny taberinakelin’Andriamanitra dia eo amin’ny olona , ary Izy hitoetra eo aminy , ary ireo ho olony , ary Andriamanitra no hitoetra eo aminy , dia ho Andriamaniny . Ary hofafany ny ranomaso rehetra eo amin’ny masony ; ary tsy hisy fahafatesana intsony , na fanaintainana , fa efa lasa ny zavatra taloha  . Ary hoy ilay mipetraka eo ambonin’ny  seza fiandrianana : “Indro , havaoziko ny zavatra rehetra” .  Ary hoy koa Izy ; “Soraty , fa mahatoky sy marina ireo teny ireo” .   Apokalypsy 21 : 3-5

Izao tontolo izao voadio

1.-Inona no ho tonga amin’ny tany raha vantany vao voahaisotra ny ratsy ? Isaia 65 : 17 ; II Petera 3 : 13 . Iza no handray an’io lova mahatalanjona io ? Apokalypsy 21 : 5-7

 

              Ary nahita lanitra vaovao aho ; fa efa lasa ny tany voalohany . Apokalypsy 21 : 1 . Manadio ny tany ny afo izay mandevona ny ratsy fanahy . Voafafa ny ozona rehetra . Tsy hisy helo mirehitra afo mandrakizay eo anantrehan’ireo voavonjy hampahatsiaro mandrakariva ny vokatra mahatsiravina avy amin’ny fahotana . Hery Mifanandrina p 701

            Ny tany izay nampanantenaina azy ireo dia tsy ho hamaizinin’ireo aloky ny fahafatesana intsony . Tsy ho hamaizinin’ny ozona tahaka ity tany ankehitriny ity . Une Vie Meilleur p 30

2 .-Inona ireo marika izay ho famantarana mitoetra mandritra ny fotoana rehetra  , mba ho fampahatsiarovana an’ilay vidiny naloha  tamin’ny fanatanterahana an’ilay fanavotana ? Zakaria 13 : 6

       

   Fampahatsiahivana tokana ihany no hitoetra : hitondra mandrakariva ny holatry ny nanombohana Azy tamin’ny hazo fijaliana Ilay Mpanavotra antsika . Eo amin’ny lohany noratraina , eo amin’ny lanivoany , eo amin’ny tànany aman-tongony ,  ireo no hany soritry ny asa mahatsiravina nataon’ny fahotana . Hoy ny mpaminany raha mibanjina an’i Kristy ao amin’ny voninahiny izy . “ Misy famirapiratana toy ny mazava , ary misy tana-masoandro avy eo amin’ny tànany ; ary ao no fiheren’ny heriny ” Habakoka 3 : 4 . Amin’io lanivoany voatrobaka io izay nijininihan’ny ra nampihavana ny olombelona tamin’Andriamanitra , no ahitana ny voninahitry ny Mpamonjy , ao no “ fieren’ny heriny ” . Mahery ka mahavonjy Izy amin’ny alalan’ny soron’ny fanavotana , noho izany dia manankery hampihatra famaliana amin’ireo izay nanamavo ny famindram-pon’Andriamanitra Izy . Koa ny mariky ny fanetren-tenany no voninahiny ambony indrindra ; mandritra ny mandrakizay dia hampiseho ny fiderana Azy sy ny heriny ny holatr’i Kalvary . Hery Mifanandrina p 701

Tafafindra nankao anatin’ilay fanjakana    

      

3 .-Iza ireo hanana fifaliana satria tafafindra ao anatin’ilay fanjakan’ny fiadanana sy fahamarinana ? Kolosiana 1 : 12-14 ; Salamo 37 : 29

 

          “ Ary ianao , ry tilikambon’ny andiany , tendrombohitr’i Ziona zanakavavy , aminao no ho tonga izany , eny ho tonga voalohany ” . Tonga izao ny fotoana nandrandrain’ny olona masina hatramin’ny nanakanan’ny lelafon’ny sabatra mihebiheby ireo mpivady voalohany tsy hiditra tany Edena , dia ny fotoana “ ho amin’ny fanavotana ny olona izay nalainy ho an’ny tenany ” Efesiana 1 : 14 . Ny tany izay nomena ny olona tany amboalohany ho fanjakany , kanefa natolony eo ampelatanan’i Satana , ary notazonin’io fahavalo mahery io ela dia ela , ankehitriny dia tafaverina tamin’ny alalan’ny drafitry ny fanavotana . Tafaverina avokoa izay rehetra very noho ny fahotana . “ Fa izao no lazain’i Jehovah , Izay nahary ny lanitra sady namorona ny tany sy nahavita azy . Izy no nandamina azy , tsy ho tany tsy misy endrika no namoronany azy ,fa nataony honenana ” Isaia 45 : 18 . Tanteraka ny fikasan’Andriamanitra tany amboalohany , tamin’ny namoronany ny tany dia ny hanao azy ho fonenan’ny voavotra mandrakizay . “ Ny marina handova ny tany , ka honina eo aminy mandrakizay ” Salamo 37 : 29  . Hery Mifanandrina pp 701 , 702 .

Tena sambatra sy miravoravo ao anatin’ny fanjakan’Andriamanitra

4 .-Inona no fanandramam-piainana hataon’ireo zanak’Andriamanitra  ao anatin’io fanjakana io ? Isaia 64 : 18-19 , 24-25 . Inona ireo asa tsy tambo hisaina izay andraisan’izy ireo anjara ao ? Isaia 65 : 21-23 .

            Ny hazo fijalian’i Kristy no ho fianarana sy ho antokiran’ny voavotra mandritra ny mandrakizay manontolo . Ao amin’i Kristy omem-boninahitra no hibanjinany an’i Kristy voahombo . Hery Mifanandrina p 677

                Any amin’ny tany vaovao , dia hibanjina ny hery mahagaga nahariana izao rehetra izao sy ny zava-miafin’ilay fitiavana manavotra ny voavonjy . Any tsy hisy fahavalo masiaka , mamitaka haka fanahy antsika hanadino an’Andrianitra . Hivelatra ny fahaizana rehetra , ary hitombo ny talenta rehetra . Tsy hanasatra ny saina na handany hery ny fitadiavam-pahalalana . Ho tanteraka any ny fikasana miezinezina indrindra , ho tratra ny zava-kendrena ambony indrindra , ho tanteraka ny  faniriana ambony indrindra ; ankoatra izany anefa dia mbola hisy ihany tendro vaovao ho tratrarina ; zava-magaga vaovao hahaliana , anton-javatra vaovao hampiasana ny herin’ny saina sy ny fanahy ary ny tena  .  Hery Mifanandrina p 704

Ny fitondram-panjakan’Andriamanitra ao amin’ilay tontolo vaovao 

5 .-Inona ilay andro voatendry manokana izay iangonan’ireo olona voavotra mba hiankohofany amin’Andriamanitra ?   Salamo 111 : 8 ; Isaia 66 : 22-23

 

Tsy hahalala lalàna hafa noho ny an’ny lanitra ireo voavotra . Ho tonga fianankaviana anankiray sambatra sy miray hina izy ireo , ary hotafiana akanjom-piderana sy fisao-rana . Hanakoako amin’izay ireo feon-kira masina avy amin’ny kintan’ny maraina . Hampitalakotrokotroka ny feon’olon-tsambatra ananany ny zanak’ Andriamanitra rehetra , ary hiaraka hanambara Andriamanitra sy Kristy hanao hoe : “ Tsy hisy ota intsony , ary ho foana mandrakizay ny fahafatesana” . “Ary isaky ny voaloham-bolana sy isan-tSabata dia ho avy ny nofo rehetra hiankohoka eo anantrehako , hoy Jehova” Isaia 66 : 23 . Dia hiseho ny voninahitr’i Jehovah , ary ny nofo rehetra hiara-mahita izany . Dia toy izany no hampisehoan’i Jehovah Tompo fahamarinana sy fiderana eo anantrehan’ny firenena rehetra . Ary amin’izany andro izany Jehovah Tompon’ny maro , dia ho satro-boninahitra tsara tarehy sy ho fehiloha firavaka ho an’ny olony sisa . Mpaminany sy Mpanjaka p 597

         Raha mbola misy koa ny lanitra sy ny tany , dia mbola ho famantarana ny herin’ny Mpamorona ihany ny Sabata . Ary rehefa tafaverina indray amin’ny faha-tsaran-tarehiny eto an-tany Edena , dia hohajain’ny rehetra ny andro fitsaharana masin’Andriamanitra . Ary isan-tSabata dia ho avy hiankohoka eo anantrehako ny mponina rehetra ao amin’ny tany vaovao  be voninahitra , hoy Jehovah . Isaia 66 : 23 . Ilay Fitiavana Mandresy p 293

6 .-Aiza no ho renivohitr’ilay fitondram-panjakana mandrakizain’ny faha-soavana sy fitiavana ? Apokalypsy 21 : 10-11 , 24 .

  

              “Jerosalema vaovao” no renivohitry ny tany vaovao be voninahitra izay “ satro-boninahitra eo an-tànan’i Jehovah sy ho satrok’andriana eo ampelantànan’ Andriamanitra”.“Ny famirapiratany dia ho tahaka ny vatosoa indrindra , dia ho taha-ka ny vato jaspy , manganohano tahaka ny vato kristal ”. “ Ary ny firenena maro no handeha amin’ny fahazavany : ary ny mpanjakan’ny tany dia mitondra ny vonina-hiny ho ao anatiny ”.  “ Dia ho faly amin’i Jerosalema Aho sy ho ravoravo amin’ny oloko ” . “ Indo ny tabernakelin’Andriamanitra dia eo amin’ny olona , ary Izy hitoetra eo aminy ary ireo ho olony , ary Andriamanitra no hitoetra eo aminy , dia   ho Andriamaniny ” . Isaia 62 : 3 ; Apokalypsy : 11 , 24  . Hery Mifanandrina p703

7.- Fomba ahoana , ary inona no antony hankalazàna mandrakizay ny tany ?  Avy aiza no hifehezana ny voahary manontolo ? Apokalypsy 21 : 3 ; Romana 5 : 20-21

 

             Ho tanteraka ny asan’ny fanavotana . Teo amin’izay nihabeazan’ny ota no nihoaran’ny fahasoavana be lavitra . Ny tany mihintsy , dia ilay toerana ihamboan’ Satana fa azy , dia tsy hoe avotana fotsiny , fa asandratra koa . Ity izao tontolo izao kelintsika ity izay eo ambanin’ny ozon’ny fahotana , ka hany pentina mainty eo amin’ny voahary be voninahitra nataon’Andrimanitra , dia homem-boninahitra ambonin’izao tontolo izao rehetra . Eto amin’ity tany ity , izay nitoeran’ny zanak’Andriamanitra an-day tao amin’ny nofon’olombelona , izay niveloman’Ilay Mpanjakan’ny voninahitra , izay nijaliany sy nahafatesany . Rahatrizay hohavaoziny ny zavatra rehetra ka ho eo amin’ny olona ny taberinakelin’Adriamanitra , eto amin’ity tany ity no : “ hitoetra eo aminy Izy , ary ireo ho olony , ary Andriamanitra no hitoetra eo aminy , dia ho Andriamaniny” . Koa mandritra ny andro maro tsy manam-pahataperana , raha mandeha eo amin’ny fahazavan’ny Tompo ny voavotra , dia hidera Azy izy ireo noho Ilay Fanomezany tsy hay ambara . Dia Imanoela. Amintsika Andriamanitra . Ilay  Fitiavana Mandresy pp 17 , 18

Mba ho saintsainina lalina

Isaia  9 : 6-7 ; 33 : 14-17 ; 35 : 10 ,  I Korintiana 13 : 12-13

           … Tsy misy manamaloka ny fijeriny eo am-pitazanana ny voninahitry ny famoronana . Ny masoandro sy ny kitana ary ireo vondron-kintana , samy mandeha manodidina ny seza fiandrianan’Andriamanitra araka ny sori-dalana voatendry hizorany avy . Ny zavatra rehetra , hatramin’ny kely indrindra ka hatramin’ny lehibe indrindra , dia misy ny anaran’ny Mpamorona voasoratra eo aminy avokoa , ary izy rehetra dia samy maneho raki-tsarobidin’ny heriny avokoa .

              Ireo izay manaiky ny fampianaran’ny tenin’Andriamanitra dia tsy havela tsy hahalala tanteraka ny mikasika ny fonenana any an-danitra . “ Koa izay tsy mbola hitan’ny maso ary tsy mbola ren’ny sofina na niditra tao am-pon’ny olona no efa namboarin’Andriamanitra ho an’izay tia Azy ” Apokalypsy 2 : 9 . Tsy ampy hahalaza ny momba ny valisoan’ny  marina ny fitenin’olombelona . Izay hahita azy ihany no hahafanatra azy . Tsy misy saina voafetra afaka hahatakatra ny voninahitry ny paradisan’Andriamanitra . Hery Mifanandrina pp 705 , 702

NY FANATANTERAHANA AN’ILAY DIDIM-PITSARANA

              Rehefa hanomboka ny fitsara , ary ny tsirairay dia ho tsaraina araka izay voasoratra ao antin’ireo boky , ny fahefan’ny lalàn’ Andriamanitra dia ho raisina amin’ny fomba hafa izay tsy mitovy amin’ny fomba handraisan’ny olona azy amin’izao fotoana izao eo amin’ny tontolo kristianina . Satana dia efa nanajamba ny mason’io tontolo kristianina io , sy nampisafotofoto ny tsilon-tsainy , tahaka ny nanajambany ny mason’i Adama sy Eva , sy nanosehany azy ireo ho amin’ny fandikan-dalàna . Ny lalàn’i jehova dia tena lehibe mitovy amin’Ilay mpanao azy ihany . Eo amin’ny fotoanan’ny fitsarana , io lalàna io dia ho fantatra fa masina , marina sy tsara eo amin’ireo fitakiany rehetra . Ireo izay mandika azy dia hahafantatra fa hanao fampamoahana lehibe sy mampahita loza eo anantrehan’Andriamanitra . Satria mantsy ireo fitakian’Andriamanita dia mahatapaka . ( RH 7 /5 1901 )  Commentaires Bibliques p 414

Ny fihetsika mamitaka sy mahery miady ananan’i satana

1 .-Inona no ho fihetsik’i satana aorian’ilay fitsanganan’ireo mpankahala fivavahana ? Karazan’olona manao ahoana ireo izay ho eo ambany fahefany ? Apokalypsy 20 : 3b , 7 .

                         

                Rehefa izany , Jesosy sy ireo anjeliny , narahin’ireo olona voavotra rehetra , dia niverina nankeo amin’ilay tanàna . Ireo ratsy fanahy niharan’ny fanamelohana , dia nitaraina sy nidridridridry nameno ny habakabaka . Tamin’izay , dia hitako i satana nanomboka indray ny asany . Izy dia nandalo , ary niverina nandalo indray teo amin’ireo olom-peheziny , nampahery an’ireo malemy , ary niteny tamin’izy ireo fa izy sy ny  anjeliny dia mahery indrindra .  Notondroiny ireo olona marobe tsy hita isa izay nitsangana tamin’ny maty  .Tao amin’izy ireo dia nisy mpiady tena malaza indrindra , mpanjaka maro izay tena havanana indrindra amin’ny ady , izay nandresy sy naka fanjakana  maro . Tao koa ireo olona lavabe sy matanjaka , ireo lehilahy mahery fo izay mbola tsy resy mihintsy hatrizay hatrizay . Isan’izy ireo ihany koa i Napoléon  , ilay mpanjaka feno avonavona sy fahavononana miredareda hanam-pahefana , izay nampangovitra fanjakana maro raha vantany vao manantona fotsiny izy . Hita tao ihany koa ireo lehilahy maro izay nanana halavana mahagaga sy tsanganana feno fahamendrehana izay tsy lavo nandritra ny ady , ary nangetaheta fandresena mandrakariva . Rehefa nivoaka avy tao anatin’ny fasana izy ireo , dia nanohy indray nanamasaka ny fizotran’ny eritreriny izay natsahatry ny fahafatesana . Izy ireo dia nanolokolo ny faniriana te handresy izay nameno ny sainy rehefa lavo izy . Pemiers Ecrits pp 292 , 293

2 .-Ahoana no fomba andresen’i satana lahatra an’ireo olona ireo mba hitambatra aminy eo amin’ilay ady hanoherany an’i Jesosy sy ireo olona voavotra ? Apokalypsy 20 : 8

 

               Manomana ny ady mafy farany ahazoana ny fahefana fara-tampony izao i Satana . Raha mbola nesorina taminy ny heriny ka voasakana tsy hanao ny asa famitahana ny andrianan’ny lanitra , dia oriory izy sady kivy , nefa kosa rehefa mitsangana amin’ny maty ny ratsy fanahy , ka hitany ireto vahoaka marobe miandany aminy , dia velona indray ny fanantenany , ka tapa-kevitra izy fa tsy hitsoaka amin’ity ady goavana ity . Halahany eo ambany fanevany ny tafiky ny olom-bery rehetra , ka amin’ny alalan’ireo no ilofosany hanatanteraka ny teti-kady novolavolainy . Babon’i Satana ny ratsy fanahy . Nanaiky ny hotarihin’ny lehiben’ny mpikomy izy ireo tamin’ny nandavany an’i Kristy . Vonona ny handray ny soso-kevitra avy aminy sy hankato ny baikony izy . Toy ny efa fanaony hatrany amboalohany anefa , dia tsy miseho mivantana ho i Satana ilay fahavalo . Mihambo ho andriana tompon’izao tontolo izao araka ny hitsiny izy , ary tsy andrariny no nankana an-keriny ny fananany taminy . Miseho ho toy ny mpanavotra izy amin’ireo mpanompony voafitaka , ary manome toky azy izy fa , ny heriny no namoaka azy ireo avy ao ampasany , ary efa madiva hamonjy azy avy eo ampelatanan’ny fitondrana tsy refesimandidy lozabe indrindra izy . Satria miala ny fanatrehan’i Kristy dia manao fahagagana i Satana hanohanany ny fihamboany . Mampahatanjaka ny malemy izy ary mahatonga ny rehetra hanana ny toe-tsainy sy ny herimpony …. Hery Mifanandrina p 690                

                                                                     

Ny ady farany ho amin’ny fahefana 

3 .-Eo ampanohizana ny ady ho amin’ny fahefana , inona no hetsika hataon’i Satana sy ireo mpankahala fivavahana ?  Apokalypsy 20 : 9a

 

     … Manolo-tena hitarika azy hiady amin’ny tobin’ny olona masina izy , sy haka ankeriny ny tanànanAndriamanitra . Feno hafalian-demonia izy raha manondro ireto vahoaka alinalina tsy tambo hisaina izay nitsangana tamin’ny maty , ary ambarany fa amin’ny maha mpitarika azy , dia azony atao tokoa ny hanafaka ny tanàna ary haka indray ny seza fiandrianany sy ny fanjakany.

              Mila hevitra amin’ny anjeliny i Satana , ary avy eo dia amin’ireo mpanjaka sy mpanafika ary lehilahy mahery .  Mahita ny hery sy ny isan’ireo miandany aminy izy , ka ambarany fa vitsy tafika ao an-tanàna raha ampitahaina amin’ny azy , koa dia azony resena . Mamolavola tetika izy ireo mba hakany ny harena sy ny voninahintr’i Jerosalema vaovao . Avy hatrany dia atomboka ny fihomanana ho amin’ny ady .  Misy mpanao taozavatra havanana manefy fitaovam-piadiana . Ireo mpitari-tafika fanta-daza amin’ny fahombiazany , no mandamina ny vahoaka marobe lian’ady ho andiany sy vondrona . Hery Mifanandrina pp 690-691

4.- Na dia efa very sy mahafantatra tanteraka ny herin’Andriamanitra aza i Satana , moa ve izy  hanaiky hilefitra ? Daniel 10 : 13 .  Hatraiza no fahatongavany miaraka amin’ireo anjeliny ? Apokalypsy 20 : 9 b

 

              Amin’ny farany dia omena ny baiko handroso , ka indreo vahoaka marobe tsy hita isa no mihetsika , dia tafika miezinezina tsy mbola nisy mpitari-tafika na iza na iza teto an-tany , nibaiko izay toa azy , ka na dia avondrona aza ny andiantafika rehetra efa navory hatramin’ny niandohan’ny ady teto an-tany , dia tsy mahatoraka azy velively . Satana , ilay mpiady mahery indrindra , no loha-lalana , ary mampiray ny heriny ireo anjeliny ho amin’ity ady farany ity . Manaraka azy ny mpanjaka sy ny mpifehy mahery ary ny vahoaka marobe , manao andiany lehibe samy tarihin’ny mpitarika voatendry avy . Mandroso amim-pilaminana toy ny famindran’ny miara-mila ireo laharana mifanizina mamakivaky ny tany mitriatriatra sy mikitoatoana , manatona ny tananan’Andriamanitra . Noho ny baikon’i Jesosy dia akatona ny vavahadin’i Jerosalema vaovao .… Hery mifanandrina p 691

Fisehoan’ny voninahitr’Andriamanitra

5 .-Faminaniana inona ary no ho tanteraka ? Inona no ho hitan’ireo mpankahala fivavahana ? Kolosiana 3 : 4

                Rehefa izany , Jesosy sy ireo tafik’anjeliny manontolo , ary koa ireo olona masina rehetra , izay nisatroka satro-boninahitra mamirapiratra , dia niakara teo amin’ny rindrin’ny mandan’ilay tanàna . Jesosy dia niteny tamin’ny feo feno fiandrianana manao hoe : “ Ry mpanota aoka ianareo  hibanjina ny valisoan’ireo olona marina . Ary ianareo izay olona navotana dia aoka hibanjina ny tambiny raisin’ireo ratsy fanahy ”  . Ilay vondrona lehibe misy an’ireo ratsy fanahy dia mijery ilay vondrona feno voninahitra misy an’ireo olona  marina , izay  nitsangana teo ambonin’ny rindrin’ilay tanàna . Teo ampahitana  ny famira-piratr’ireo satro-boninahitra manjelanjelatra teo amin’ny lohan’ireo olona marina , ary koa ny tavan’izy ireo mamirapiratry ny voninahitra , sady mampitomaratra ny endrik’i Jesosy , ary koa , teo ampibanjinana an’ilay voninahitra tsy hay lazaina , sy ny fiandrianan’ilay Mpanjakan’ny Mpanjaka , sy Tompon’ny Tompo ,  dia niha ketraka ny herim-pon’ireo ratsy fanahy . Pemiers Ecrits pp 293 , 294

Ny fiafaran’ilay ady ho amin’ny fahefana 

6 .-Rehefa izany , inona ary no hanjo an’ireo olona very an’alinalina ireo ? Apokalypsy 20 : 9-10 . Ho fitsinjovana an’izany rehetra izany , inona no zavatra izay tsy maintsy ilaintsika hianarana ? I Jaona 3 :4 ; Romana 6 : 22a

  

            Toa tsy mahahetsika i satana raha mibanjina ny voninahitra sy ny fian-drianan’i Kristy . Tsaroan’ilay kerobima manaloka fahiny ny toerana nahalavoany . Serafima namirapiratra izy . “ zanaky ny maraina ” , kanefa akory izato fiovany , izato fitotongany . Voaroaka mandsrakizay tsy ho ao amin’ny filan-kevitra izay nanomezam-boninahitra azy fahiny izy . Hafa izao no hitany mijoro eo anilan’ny Ray , manarona ny voninahiny . Hitany ny satro-boninahitra napetraky ny anjely avo ranjanana sy miendrik’andriana teo andohan’i Kristy , ary fantany fa ny toerana ambony tazonin’io anjely io dia nety ho azy teo aloha .  Hery Mifanandrina p 696

                Satana dia niantoraka niroso teo afovoan’ilay vondrona misy azy , manao izay hanosehany an’ireo olona an’alinalina ireo hanao hetsika . Kanefa moa Andriamanitra dia mandatsaka afo avy any an-danitra , ary ireo lehibe eto amin’izao tontolo izao , ireo olona mahery , ireo andriana sy ireo sahirana , dia ho levon’ny afo avokoa . Hitako fa ny sasany dia levona vetivety  , fa ny sasany kosa dia nijaly nandritra ny fotoana elaela ihany . Izy ireo dia nandray ny anjarany araka izay nataony tamin’ny fahavelomany . Ny sasantsasany dia naharitra andro maromaro  vao levona , ary raha mbola nisy aina kely tao anatin’izy ireo tao , dia tsapany tsara ny fijaliana  sy ny fanaintainana izay nahazo azy  . Ilay anjely dia miteny mano hoe : “ Ny kankany dia tsy ho faty mihintsy , ny afon’izy ireo dia tsy ho faty mihintsy raha mbola misy koa ataoma anankiray harapaka” . Premiers Ecrits p 294

Ny fahasambaran’ireo olona voavotra

7 .-Fomba ahoana no handiovan’Andriamanitra ny tany , ary tahaka ny ahoana no fifaliana izay ho tonga mandrakizay ho an’ireo olona voavotra ? Malakia 4 : 2-3 . Iza ary arak’izany no ho Ilay Mpanjaka tokana izay mifehy ny voahary manontolo ?   Zakaria 14 : 9 ; Lioka 1 : 31-33

 

             Ilay anjely dia niteny tamiko nanao hoe : satana no fakany , ireo zanany no rantsana . Izy ireo dia ho levona ankehitriny , ireo fakany sy ireo ratsany dia maty amin’ny fahafatesana mandrakizay . Tsy hitsangana amin’ny maty intsony izy ireo na oviana na oviana . Andriamanitra dia hanao tontolo iray madio . Rehefa afaka izany dia nijery aho , ary hitako ilay afo izay nandevona an’ireo ratsy fanahy . Io afo io dia nandoro ny zavatra rehetra izay ratsy maharikoriko sy maloto . Io afo io dia manadio ny tany . Nijery indray mandeha koa aho ary dia hitako ny tany voadio . Tsy nahitana ny mariky ny ozona intsony na dia kely aza . Ny fanamboniny izay be kitoatoana teo aloha , dia lasa tahaka ny lemaka anankiray midadasika . Ny voahary manontolo , izay noforonin’Andriamanitra dia voadio ; tapitra ilay fifanandrinana lehibe . Na aiza na aiza jerena , dia tsy misy afatsy zava-kanto no hita . Ireo olona voavotra rehetra , na tanora na antitra , na lehibe na kely , dia nanipy ny satro-boninahitr’izy ireo teo an-tongotry ny Mpamonjy . Ary niankohoka teo anantrehany , ka nanompo an’Ilay anankiray izay Velona mandrakizay . Ny tany vaovao ao anatin’ny hakantony manontolo , sy ao anatin’ny voninahiny , dia ho lova mandrakizay ho an’ireo olona voavotra . Ny fanjakana sy ny fahalehibiazana izay misy eto ambanin’ny lanitra dia nomena ho an’ireo olo-masin’Ilay Mpanjaka , ary ireo olo-masina ireo dia tsy maintsy mahazo izany fanjakana izany , mandritra ny mandrakizay . Premiers Ecrits p 295

 Mba ho saintsainina lalina    

Isaia 34 : 2 ; Salamo 11 : 6 ; II Peterra 3 : 7 ; Apokalypsy 15 : 3-4

             Voaantso hiseho eo anantrehan’ny fitsaran’Andriamanitra avokoa ny ratsy fanahy rehetra , voapanga ho namadika ny fitondram-panjakan’ny lanitra . Tsy misy mpisolo vava hiaro azy ireo ; tsy manana fialan-tsiny izy ; koa dia mivoaka ny didim-pitsarana hanameloka azy amin’ny fahafatesana mandrakizay  … Tahaka ny fonjamby voaempo ny vohon’ny tany ,  izay  ahitana farihy afo midadasika misamboaravoara . Izao no andro fitsarana sy fandringanana ny olona ratsy fanahy . Fa Jehovah manana andro famaliana dia taona famaliana hiadiana ho an’i Ziona  … Nampiharina ny famaizana feno noho ny fandikan-dalàna ; afa-po ny fitakian’ny fahamarinana ; ary eo am-pibanjinana izany ny tany sy ny lanitra , dia manambara fa marina Jehovah .  Hery Mifanandrina pp 695 , 700 

NY FITSARANA IREO MPANKAHALA FAHAMARINANA MANDRITRA NY ARIVO TAONA

               Aza mitsara na inona inona alohan’ny fotoana , dia ny fiavian’ny Tompo ; izay hampiharihary ny zavatra takona ao amin’ny maizina ka hampiseho ny fikasan’ny fo . I Korintiana 4 : 15 . Lazain’i Daniela fa rehefa tonga ny fahagola dia homena rariny ny olo-masin’ny avo indrindra Daniel 7 : 22 . Amin’io fotoana io dia hanjaka sy ho mpisoron’Andriamanitra ny marina . Hoy i Jaona ao amin’ny Apokalypsy hoe : “Ary nahita ny seza fiandrianana maro aho , ary nisy nipetraka teo amboniny , ary nomena fahefana hitsara izy . Ho mpisoron’Andriamanitra sy Kristy ireo ka hiara-manjaka aminy arivo taona”  Apokalypsy 20 : 4-6 . Amin’io fotoana io araka ny nambaran’i Paoly mialoha , dia hitsara izao tonolo izao ny olona masina . I Korintiana 6 : 2  . Hery Mifanandrina pp 686 , 687

Voafatotra mandritra ny arivo taona 

1 .-Eo ampijerevana ny lasa sy ny ho avy , inona no nosoratan’ny mpaminany anankiroa mikasika an’i Losifera ? Isaia 14 : 12-14 ; Apokalypsy 20 : 1-3 .

             Raha nitazana mialoha ny fotoana haharesen’i satana ny mpaminany Isaia , dia nanao hoe : “ Endrey latsaka avy tany an-danitra ianao ry ilay fitarik’andro , zanaky ny maraina ; voakapa hianjera amin’ny tany ianao , ry ilay mpandripaka firenena … ! Ary ianao efa nanao anankapo    hoe : Any an-danitra no hiakarako ary ambonin’ny kintan’Andriamanitra no hanandratako ny seza fiandrianako … ho tahaka ny Avo Indrindra aho .  Kanjo hampidinina hatrany amin’ny fiainan-tsy hita ho any am-para-vodilavaka ianao . Izay mahita anao hibanjina anao sy hihevitra anao hoe :  Moa io va ilay lehilahy nampihorohoro ny tany sy nampihozongozona ny fanjakana ; ary nanao izao tontolo ho efitra sy nandrava ny tanànany ary  tsy nandefa ny mpifatotra hody ?  Hery Mifanandrina p 685 ,                                                                                                            

              Lazain’ny mpanoratra ny Apokalypsy mialoha ny amin’ny fandroahana an’i Satana sy  ny fikorontanana ary ny fandravana ny tany , ka ambarany fa haharitra arivo taona izany toe-javatra izany . Rehefa avy nitantara izay hiseho amin’ny fiavian’ny Tompo fanindroany sy ny fandringanana ny ratsy fanahy ny faminaniana , dia manohy ny fanambarany amin’ny hoe : Ary hitako fa indro nisy anjely nidina avy tany an-danitra , nanana ny fanalahidin’ny lavaka tsy hita noanoa sy gadra lehibe eny an-tànany , dia nisambotra an’ilay dragona izy ka namatotra azy arivo taona … Hery Mifanandrina p 684 .

Fitsarana an’ireo mpankahala fivavahana

2 .- Inona no lazain’ny Baiboly mikasika ny fitsarana an’ireo mpankahala fivavahana ? Iza no handray anjara amin’io fitsarana io ? Apokalypsy 20 : 4 ; I Korintiana 6 : 2 .

  

              Mandritra ny arivo taona manelanelana ny fitsanganana voalohany sy faharoa no hanaovana ny fitsarana ny ratsy fanahy . Manondro io fitsara io ho toy ny toe-javatra manaraka ny fiavian’i Kristy fanindroany ny apostoly Paoly … Lazain’i Daniela fa rehefa tonga ny Fahagola dia homena rariny ny olo-masin’ny Avo Indri-ndra Daniel 7 : 22 . Amin’io fotoana io dia hanjaka sy ho mpisoron’ Andriamanitra ny marina . Hoy i Jaona ao amin’ny Apokalypsy hoe : “Ary nahita ny seza fiandria-nana maro aho , ary nisy nipetraka teo amboniny , ary nomena fahefana hitsara Izy . Ho mpisoron’Andriamanitra sy Kristy ireo ka hiara-manjaka Aminy arivo taona” Apokalypsy 20 : 4 , 6 . Amin’io fotoana io , araka ny nambaran’i Paoly mialoha , dia hitsara izao tontolo izao ny olona masina , I Korintianina 6 : 3 . Miaraka amin’i kristy izy mitsara ny ratsy  fanahy , ka hampitaha ny asa nataony amin’ny bokin’ny fitsipika , dia ny Baiboly , ary nanao fanam-pahankevitra momba ny tsirairay , araka ny zavatra nataon’ny teneny avy . Avy eo dia tapahina ny anjara tsy maintsy hozakain’ny ratsy fanahy araka ny asany avy , ary soratana manandrify ny anarany ao amin’ny bokin’ny fahafatesana izany .  Hery Mifanandrina pp 686 , 687

3 .-Iza no miandraikitra an’io fitsarana io ? II Timoty 4 : 1 ; Jaona 5 : 22

 

               Rehefa afaka izany dia nahita seza fiandrianana maro izay nipetrahan’i Jesosy sy ireo olona navotany aho ; satria izy ireo dia hanjaka toy ny mpanjaka sy ny mpisorona , nitambatra tamin’ny vahoakany , dia nitsara an’ireo ratsy fanahy izay efa maty , nandinika ny nataon’ireo ratsy fanahy ireo araka izay ao anatin’ny bokin’ny lalàna , dia ny tenin’Andriamanitra , ka nanapaka ny momba ny tsirairay araka izay  zavatra nataony tamin’ny fahavelony . Rehefa vita izany , ireo olona voavotra miaraka amin’i Jesosy dia mametra ny halavam-potoana izay tsy maintsy hijalian’ireo ratsy fany ireo , arakaraka ny asa nataony . Izany rehetra izany dia voasoratra ao anatin’ny bokin’ny fahafatesana . Premiers Ecrits p 290

 Fitsarana an’i Satana sy ireo anjeliny

4 .-Iza ihany koa no ho tsaraina eo amin’io fitsarana io ? Nahoana moa i satana no handray ny didim-pitsarana izay tena mavesatra indrindra ?  I Korintiana 6 : 3 ; II Petera 2 : 4 ; Joda and 6

 

                Satana sy ny anjeliny koa dia tsarain’i Kristy sy ny vahoakany . Hopy i Paoly ; “ Tsy fantatrareo va fa hitsara anjely isika ”. Ary i Joda nilaza fa : “ Ireo anjely izay tsy nitana ny anjara fanapahany , fa nandao ny fonenany , dia voahazony amin’ny fatorana mandrakizay ao amin’ny maizina ho amin’ny andro fitsarana lehibe ”Joda and 6 . Hery Mifanandrina p 687

              Satana sy ireo anjeliny ihany koa  dia notsarain’i Jesosy sy ireo olona voavotra . Ny sazy ahatra amin’i Satana dia tsy maintsy mafimafy kokoa mihoatra noho ny sazy ahatra amin’ireo olona izay nofitahany . Tsy misy fampitahana azo atao amin’ireo fijaliana andalovan’i Satana sy ny fijalian’ireo olona ratsy fanahy nofitahany . Rehefa levona ireo olona rehetra voafitany , Satana dia tsy maintsy mbola ho velon-dratsy afa-baraka mandritra ny fotoana elaela kokoa .                                          Premiers Ecrits pp 290 , 291

Aorian’ny arivo taona

5 .-Inona ireo tranganjavatra izay manarakaraka ny fiafaran’ilay arivo taona any an-danitra ?  Ahoana no fomba anamboaran’i Jesosy ny toerana ho an’ilay tanàna masina eto ambonin’ny tany ? Apokalypsy 21 : 22 ; Zakaria 14 : 4

 

               Amin’ny fiafaran’ny arivo taona , dia hiverina indray eto an-tany i Kristy . Otronin’ny tafiky ny voavotra Izy ary arahin’ny anjely … Midina eo amin’ny tendrombohitra Oliva i Krisy , izay toerana niakarany taorian’ny nitsanganany tamin’ny maty , sy namerenan’ireo anjely ny teny fikasana momba ny fiverenany koa . Hoy ny mpaminany : “ Ary ho avy Jehovah Andriamanitro mbamin’ny masiny rehetra momba Azy ”. “ Ary amin’izany andro izany , ny tongony hijoro eo an-Tendrombohitra Oliva hitresaka eo afovoany … ka hisy lohasaha lehibe ”. “ Ary Jehovaha ho Mpanjakan’ny tany rehetra : amin’izany andro izany dia ho iray no Jehovah : sady iray no anarany ” Zakaria 14 : 5 , 4 , 9 . Rehefa midina avy any an-danitra Jerosalema vaovao izay sady kanto no mamirapiratra , dia hipetraka eo amin’ny toerana efa nodiovina sady voaomana handray azy , ka hiditra ao amin’ny Tanàna Masina i Kristy miaraka amin’ny vahoakany sy ny anjeliny .  Hery Mifanandrina pp 689 , 690

6 .-Iza no hatsangana amin’ny maty eo amin’ny fitsanganana faharoa ? Inona no maha samihafa ny fitsanganana voalohany sy faharoa ? Apokalypsy 20 : 5a , 6 ; Jaona 5 : 28-29 .

             

 Amin’ny fiafaran’ny arivo taona no hisy ny fitsanganana faharoa . Amin’izany dia hitsangana amin’ny maty ny ratsy fanahy ka hiseho eo anantrehan’Andriamanitra ho fanatanterahana ny didim-pitsarana voasoratra . Toy izao no lazain’ny mpanoratra ny Apokalypsy , rehefa avy nitantara ny fitsanaganan’ny tsara fanahy izy : “ Fa ny sisa amin’ny maty dia tsy mbola ho velona mandra-paha tapitry ny arivo taona” Apokalypsy 20 : 5 . Ary hoy Isaia amin’ny ratsy fanahy : “ Dia hangonina ao andavaka tahaka ny mpifatotra ireny ka hohidiana ao an-tranomaizina , ary rehefa afaka andro maro dia ho vangiana ihany izy ”. Isaia 24 : 22 . Hery Mifanandrina p 687

             Rehefa izany , Jesosy nampiseho fiandrianana mahagaga , dia niantso an’ireo maty mba hivoaka hiala avy ao anatin’ny fasana . Izy ireo dia nivoaka avy tao niaraka tamin’ny vatany osa , farofy , izay nidina tao anatin’ny lavaka . Endrey , zavatra maha te hijery loatra izany . Eo amin’ny fitsanganana amin’ny maty voalohany , ireo olona voavotra dia hifoha aoanatin’ilay vonikazon’ny tsy fahafatesana . Fa kosa eo amin’ny fitsanganana amin’ny maty faharoa ,ireo ratsy fanahy dia mitondra an’ireo marika hita mason’ny ozona . Ireo ngezalahy eto amin’izao tontolo izao , ireo mpanjaka , ireo malemy sy matanjaka , ireo manampahaizana sy ny ireo tsy manam-pahalalana , ireo rehetra ireo dia miara-mitsangana.  Premiers Ecrits p 292 .

Ny faniriantsika dia ny hitsangana  amin’ny maty eo amin’ny fitsanganana  voalohany

7 .-Ao amin’ny teniny , inona no lazain’Andriamanitra amin’ireo izay maniry ny hitsangana eo amin’ny fitsanganana amin’ny maty voalohany ? I Jaona 5 : 11-12 ; II Petera 3 : 9 , 11 , 13-14 .

               Isika rehetra , amin’ny maha zava-boahary notahian’Andriamanitra antsika , izay afaka mamotopototra tsara , manana saina sy fahalalana ary fahaizana mitsara zavatra , dia tsy maintsy mahafantatra ny andraikintsika eo anantrehan’ Andriamanitra . Ny fiainana izay nomeny antsika dia andraikitra masina , ka tsy misy mihintsy fotoana na dia iray aza izay ahazoantsika alàlana manao antsirambina an’io fiainantsika io , satria isika dia tsy maintsy hijoro manatrika an’Adriamanitra eo anantrehan’ireo bokin’ny lanitra . Ao anatin’ireo bokin’Andriamanitra , ny fiainantsika dia voaseho amim-pitandremana fatratra mitovy amin’ny sary apetraky ny mpaka sary eo amin’ny takela-barahana . Isika dia ho tompon’andraikitra ny amin’ny zavatra izay nataontsika , ary tsy izany fotsiny ihany , fa hazonina ho tompon’ andraikitra ny amin’ny fanaovana antsirambina ka tsy nanao ny zavatra izay tokony ho natao . Isika dia tsy maintsy ampamoahana ny amin’ireo toetrantsika izay tsy nohatsaraintsika , sy ireo zavatra fananaraotra izay tsy noraisintsika .                                                             RH  22 / 9 / 1891  Commentaires Bibliques p 415 

                                                           

Mba ho saintsainina lalina 

 Joda and 14-15 ; I Petera 4 : 18-19  ;Salamo 37 : 9 ; Apokalypsy 5 : 11-13

               Ny rehetra dia mahita an’Ilay Zanak’Olona , ary ireo olona noforoniny mihintsy , izay nanao tsinontsinona Azy ho fimehezana , nametaka satro-boninahitra tsilo teo amin’ny handriny masina , ary nikapoka Azy tamin’ny volotara , dia mahita Azy ao anatin’ilay  fiandrianany amin’ny maha Mpanjaka Azy . Ireo izay nandrora teo amin’ny tarehiny tamin’ilay fotoana nijaliany , no indro ankehitriny fa mitodika mba hiala amin’ilay fijeriny manatrika sy mahery , ary ny famirapiratry ny tavany . Ireo izay namatsika ny tànany sy ny tongony , dia mahita  an’ireo  holatra vokatry ny nanomboana Azy teo amin’ny hazo fijaliana . Mahita Azy tahaka izany ihany koa ireo izay nandefona ny lanivoany. Premiers Ecrits p 292