NY ASA FANELANELANANA AO AMIN'NY FITOERANA MASINA ANY AN-DANITRA

 “ Kristy no nampiseho ny Rainy teto amin’izao tontolo izao ary mampiseho ihany koa eo anatrehan’ Andriamanitra ireo olon-boafidy izay namerina indray ilay endrin’ Andriamanitra. Izy ireo no lovany… tsy misy mpitondra fivavahana, tsy misy mpiandany amin’ny foto-pivavahana anakiray afaka ny hanambara ny Ray afa tsy ny Zanany ihany, eny fa na dia ny zanak’i Adama aza. Ny olombelona dia manana mpisolo vava, mpiaro, izay afaka mamela ny fandikan-dalàna.” That I May Know Him, p. 73.

JESOSY ILAY MPISOLO VAVA

1. .Inona no toerana raisin’I Jesosy eo anatrehan’Andriamanitra, rehefa misokatra ny boky ka dinihana ny momba ny olona tsirairay? 1 Jaona 2 : 1 ;Hebreo 9 : 24. Miatomboka  amin’iza ary mifarana amin’iza izany fanelanelanana izany ? 1 Petera 4 : 17.

 

« Hiseho amin’ny maha mpisolovava azy ireo Jesosy ary handahatra ho azy eo anatrehan’ Andriamanitra. « Raha misy manota dia manana solovava ao amin’ny Ray isika, dia Jesosy Kristy ; Ilay marina »I Jaona 2 : 1.“ Fa Kristy tsy mba niditra tao amin’ny fitoerana masina nataon-tanana, izay tandidon’ny tena fitoerana masina, fa ho any an-danitra tokoa mba hiseho eo anatrehan’ Andriamanitra ankehitriny ho antsika” . “ Koa amin’izany dia mahavonjy tokoa izay manatona an’ Andriamanitra amin’ny alalany Izy, satria velona mandrakizay hanao fifonana ho azy  Hebreo  9 : 24 ; 7 : 25.

 « Rehefa sokafana eo amin’ny fitsarana ireo boky, dia mandalo eo anatrehan’ Andriamanitra ny fiainan’ izay rehetra nino an’I Jesosy. Atombok’ Ilay Mpisolovavantsika amin’izay velona voalohany teto an-tany ny fanehoana ny momba ireo taranaka nifandimby tsirairay ka faranany amin’ny velona ankehitriny… » – Hery Mifanandrina, p. 498, 499.

NY SASANY HO EKENA, NY SASANY HO LAVINA

2. Nahoana ny anarana sasany no ho lavina sy hofafana ao anatin’ny bokin’ny fiainana ? Ezekiela 18 : 24 ; Eksodosy 32 : 33.

 

« … Aroso ny anarana tsirairay ary fakafakaina lalina ny aminy. Misy anarana ekena , misy lavina. Rehefa misy manana fahotana tafajanona eo amin’ny boky firaketana, tsy nibebahana sy tsy nahazoana famelan-keloka, dia kosehina tsy ho eo amin’ny bokin’ny fiainana ny anarany ary vonoina tsy ho ao amin’ny boky fitadidian’ Andriamanitra ny tatitra momba ny asa tsara. Hoy Jesosy tamin’I Mosesy : “ Na iza na iza nanota tamiko, dia hovonoiko ny anarany eo amin’ny bokiko.”Ezekiela 32 : 23. Ary hoy ny mpaminany Ezekiela : « Fa raha ny marina no miala amin’ny fahamarinany ka manao meloka … ny fahamarinany rehetra izay nataony dia tsy hotsarovana Ezekiela  18 : 24. » – Hery Mifanandrina, p. 499.

3. Inona no tena manan-danja indrindra ilaina mba hahazoana ny fiainana mandrakizay? Asa 3 : 19 ; Romana 3 : 24-26.

 

« Ho an’izay rehetra nibebaka marina ny amin’ny fahotany ka mitaky ny ran’ i Kristy ho fanavotana azy amin’ny alalan’ny finoana, dia asiana soratra hoe «  Voavela » mifanitsy amin’ny anarany ao amin’ny bokin’ny lanitra ; rehefa tonga mpiray amin’ny fahamarinan’i Kristy izy, ka hita fa mifandrindra amin’ny lalàn’ Andriamanitra ny toetra amam-panahiny, dia voakosoka ny fahotany, ary hisaina ho mendrika ny fiainana mandrakizay izy. Izao no ambaran’i Jehovah amin’ny alalan’i mpaminany Isaia : « Izaho dia Izaho no mamono ny fahadisoanao noho ny amin’ny tenako, ary tsy ho tsarovako ny fahotanao » Isaia 43 : 25 . Hoy i Jesosy : « Izay maharesy dia hitafy lamba fotsy tahaka ireo koa, ary tsy hamono ny anarany eo amin'ny bokin'ny fiainana tokoa Aho, fa hanaiky ny anarany eo anatrehan'ny Raiko sy eo anatrehan'ny anjeliny » . « Ary amin'izany na zovy na zovy no hanaiky Ahy eo anatrehan'ny olona, dia hekeko kosa izy eo anatrehan'ny Raiko Izay any an-danitra. Fa na zovy na zovy no handà Ahy eo anatrehan'ny olona, dia holaviko kosa izy eo anatrehan'ny Raiko Izay any an-danitra” Apokalypsy 3 : 5 ; Matio 10 : 32, 33. – Hery Mifanandrina, pp. 499.

FITSAPANA MARINA

4. Inona no manamarika ny asan’Andriamanitra rehefa mandinika ny toetran’ny olona tsirairay Izy? Salamo 50 : 6 ; Esaia 5 : 16. Iza no soloin’Ilay Mpanelanelana vava? Salamo 50 : 5 ; Romana 6 : 22.

  

« Liana fatratra ny olona ta-hahalala ny didim-pitsarana avoaky ny fitsarana eto an-tany, nefa maivana dia maivana izany raha mitaha amin’izay hita any an-kianjan’ny lanitra rehefa misy anarana voasoratra ao amin’ny bokin’ny fiaianana entina hodinihina eo anatrehan’ny Mpitsara ny tany rehetra. Mandahatra Ilay Andriamanitra Mpanelanelana milaza fa izay rehetra nandresy tamin’ny alalan’ny finoana ny rany, dia avela ny fandikany ny lalàna, fa averina indray ao amin’ny tonkantranony tao Edena  izy, ary satroham-boninahitra amin’ny maha-mpiara-mandova azy Aminy ao « amin’ny fanapahana voalohany » Mika 4 : 8. Nihevitra i Satana tamin’ny ezaka nataony hamitahana sy hakana fanahy ny tarank’olombelona fa hanafoana ny drafitra nataon’ Andriamanitra tamin’ny namoronana ny olombelona ; nefa mangataka izao i Kristy ny hampiharana io drafitra io tahaka ny tsy ho lavo iny mihitsy ny olona.  Tsy famelan-keloka fotsiny sy fanamarinana feno sy tanteraka ihany no angatahiny ho an’ny vahoakany , fa ny andraisany anjara amin’ny voninahiny sy toerana eo amin’ny seza fiandrianany. – Hery Mifanandrina, p. 500.

NY ASAN’ILAY MPIAMPANGA

5. Eny fa na dia any an-danitra aza no mandeha ny fitsarana, inona kosa no tohizan’i Satana atao hatrany ety ambonin’ny tany ? Zakaria 3 : 1 ; Apokalypsy 12 : 12b

 

« Raha mbola mandahatra ho an’ireo niantefan’ny fahasoavany Jesosy, i Satana kosa miapanga azy eo anatrehan’ Andriamanitra ho mpandika lalàna. Efa nitady izay hitarihana azy ho amin’ny fisalasalana ilay mpamitaka lehibe, ka hahatonga azy tsy hatoky an’ Andriamanitra intsony ; ho tafasaraka amin’ny fitiavany, sy handika ny lalàny . Izao dia tondroiny ny tantaram-piainany, ireo kilema eo amin’ny toetra amam-panahiny, ny tsy fitoviany amin’i Kristy, izay nanala baraka ny Mpanavotra azy, ireo fahotana rehetra izay nakany fanahy azy, ary noho ireny dia takiany ho olony izy ireo. » – Hery Mifanandrina, p. 500.

Tahaka ny niapangan’i Satana an’ i Josoa  sy ny vahoakany , no iapangany tsy ankijanona koa ireo izay mitady ny famindrampo sy ny fitiavan’Andriamanitra mandritra ny fotoana rehetra mifandimby . Izy no ilay mpiapanga ny rahalahintsika , dia « ilay miapanga azy eo anantrehan’Andriamanitra andro aman’alina » Apokalipsy 12 : 10 . Ny fanahy rehetra izay nafahana tamin’ny herin’ilay ratsy, ka nosoratana ao amin’ny bokin’ny fiainan’ny Zanak’Ondry ny anarany , dia hiharan’ny famelezany . Tsy misy na dia olona iray aza amin’izay voaray ho fianankavian’Andriamanitra no tsy nahatonga fanoherana tamim-pahasiahana avy amin’ilay fahavalo ... Mpaminany sy Mpanjaka, pp. 476.

NY FIAROVANA NY MPINO

6. Ahoana ny fomba hiarovan’i Jesosy ny vahoakany eo anoloan’ny fitsaran’ny lanitra ? Salamo 51 : 19 ; Zakaria 3 : 2.

 

« Tsy manala tsiny ny fahotany Jesosy fa asehony kosa ny fibebahana sy ny finoany, ka mitaky famelan-keloka ho azy Izy. Asandrany eo anatrehan’ny Ray sy ny Anjely masina ireo tanany voaratra , ka hoy Izy hoe : Fantatro amin’ny anarany izy. Efa vita tombo-kavatsa eo amin’ny tanako izy. « Ny fanatitra ho an’ Andriamanitra dia fanahy torotoro ; ny fo torotoro sy mangorakoraka, Andriamanitra ô, tsy mba ataonao tsinotsinona.” Salamo 51 : 17 . Ary hoy izy amin’ilay miapanga ny vahoakany : “Hananatra anao anie Jehova ry Satana ; eny, Jehovah Izay nifidy an’I Jerosalema anie hananatra anao ; tsy forohana nosarihina  tamin’ny afo va ity ?” Zakaria 3 : 2. Hotafian’I Kristy amin’ny fahamarinan’ny tenany ireo olony mahatoky, mba hahazoany mitondra azy eo anatrehan’ny Ray“ ho fiangonana malaza, tsy misy pentimpetina na fiketronana, na izay toy izany” Efesiana 5 : 27 . Voatana ao amin’ny bokin’ny fiainana ny anarany, ary izao no voasoratra ao momba azy ireo “ ary hiara mandeha amiko mitafy lamba fotsy ireo, satria mendrika izy.” Apokalypsy 3 : 4. » – Hery Mifanandrina, pp. 500, 501.

MIKATSAKA NY FAMELAN-KELOKA AMIN’NY ALALAN’I JESOSY

7. Iza irery ihany no afaka hanome ho an’ny olona iray ny tena fibebahana amin’ny fo, ny famelan-keloka ary ireo asa tsara? Asa 4 : 12 ; 5 : 31 ; Esaia 26 : 12.

 

« Mahavelon’eritreritra ireo toe-javatra mifandray amin’ny fifaranan’ny asa fanavotana. Goavana indrindra ny zavatra voarakitr’izany. Amin’izao fotoana izao dia atao ao amin’ny fitoerana masina any ambony ny fitsarana. Efa taona maro izao no nirosoan’io asa io. Vetivey , ary tsy misy mahafatatra ny maha-vetivety an’izany – dia hiroso ny fitsarana ny velona. Eo amin’ny fanatrehan’ Andriamanitra mahatahotra no hampandalovana ny fiainantsika. Anjaran’ny fanahy tsirairay amin’izao fotoana izao, mihoatra noho ny tamin’ny hafa rehetra, ny mandatsaka am-po ny fananarana nataon’ny Mpamonjy hoe : « mitandrema, miambena, ka mivavaha, fa tsy fantatrareo izay hiavian’ny fotoana » . Marka 13 : 33. koa raha tsy hiambina ianao, dia ho tonga toy ny fiavin’ny mpangalatra Aho, ka tsy ho fantatrao izay ora hiaviako aminao.’ Apokalypsy 3 : 3. » – Hery Mifanandrina, p. 506, 507.

Mba ho saintsainina lalina

 Ohabolana 28 : 13 ; Matio 11 : 29, 30 ; Marka 13 : 33, 35, 36.

 « Ny fahotana izay tsy nibebahana sy tsy nafoy dia tsy ahazoana famelan-keloka ary tsy ho voakosoka ao amin’ny boky, fa hijoro ho vavolombelona hanameloka ny mpanota amin’ny andron’Andriamanitra. Mety ho tamin’ny antoandrobenanahary na tao amin’ny haizin’ny alina no nanaovany ny asa ratsiny ; nefa mivandravandra sy miharihary eo anatrehan’Ilay tsy maintsy hifanatrehantsika izany. Ny anjelin’Andriamanitra no vavolombelona ny amin’ny fahotana tsirairay, ary manoratra izany tsy misy diso amin’ny boky. Mety hafenina, holavina, hosaronana tsy ho hitan’ny ray, ny reny, ny vady, ny zanaka, sy ny mpiara-miasa ny fahotana ; mety tsy hisy afatsy ireo nanao heloka ihany no mikobona ny zavatra kely indrindra iahiahiana ny ratsy ; nefa dia mihanjahanja eo anatrehan’ny anjelin’ny lanitra ireny.  Ny haizin’ny alina mikitroka indrindra, ny fahaizana manafina ny fitaka rehetra, dia tsy ampy hanaronana na dia eritreritra iray aza tsy ho fantatr’Ilay Mandrakizay. Voarakitra tsy misy milao eo amin’Andriamanitra ny kaotim-bola tsy marina rehetra , sy ny varotra tsy madio rehetra . Tsy voafitaky ny endriky ny fitiavam-bavaka Izy. Tsy manao fahadisoana Izy amin’ny fanombatombanany ny toetra amam-panahy. Ny olona no mety ho voafitak’ ireo izay maloto fo , fa Andriamanitra kosa mahatsikilo ny hosoko rehetra ary mahafantatra ny fiainana anatiny indrindra. » – Hery Mifanandrina, pp. 502.